Навіны

22 мая 2023

У выставе ўзбраенняў у Менску прынялі ўдзел толькі тры замежныя дзяржавы. Гэта найгоршы паказнік за 16 гадоў

Папярэднюю выставу ў 2021 годзе наведалі чатыры краіны, у 2019-м – рэкордныя дзевяць краін.

У міжнароднай выставе ўзбраенняў MILEX-2023 у Менску прынялі ўдзел тры замежныя дзяржавы – Расея, Кітай і Іран. БРЦ высветліў, што гэта найгоршы паказнік з 2007 года.

Пры гэтым на афіцыйным сайце мерапрыемства ў раздзеле «удзельнікі» пазначаны кампаніі толькі з Расеі і Кітая. Згадак Ірану на сайце няма ўвогуле. Пра тое, што Тэгеран прывёз у Менск сваё ўзбраенне, паведамлялі дзяржаўныя СМІ, але пазней выдалілі згадкі пра гэта. На гэта звярнуў увагу тэлеграм-канал «Беларускі парадак».

Выставка MILEX 2023
Крыніца: AA/ABACA / Abaca Press / Forum

Папярэднюю выставу ў 2021 годзе наведалі чатыры краіны, у 2019-м – рэкордныя дзевяць краін. Тады ў Менск свае экспазіцыі прывезлі нават прадстаўнікі Нямеччыны і Італіі. Удзельнікі з ЕЗ прыязджалі на MILEX і ў 2017 годзе.

За ўсю гісторыю правядзення мерапрыемства (з 2001 года) такое ж сціплае прадстаўніцтва ў выставы было толькі аднойчы – у 2007 годзе. Тады ўдзел у MILEX прынялі Расея, Швецыя і Украіна. Прадстаўнікі апошняй да 2019 года неаднаразова прыязджалі на выставу. Акрамя таго, раней у Менску выстаўляліся прадстаўнікі Японіі, Казахстану, Турцыі і нават ПАР.

Знізілася і колькасць краін, якія адправілі на выставу свае афіцыйныя дэлегацыі. У гэтым годзе такіх было 19. Гэта горшы паказнік як мінімум за 20 гадоў. Для параўнання, у 2019-м 35 краін накіравалі афіцыйныя дэлегацыі ў Менск, а ў 2017 годзе – 30.

Іншыя Навіны