Больш за ўсё зарабілі расейскія прадстаўніцтвы Менскага трактарнага заводу. Агульны абʼём чыстага прыбытку чатырох кампаній – «ГД МТЗ», «ГД МТЗ Стаўрапаль», «ГД МТЗ Паўночны Захад» і «ТВК МТЗ-Татарстан» – перавысіў 1,7 млрд рублёў (25 млн долараў). Пры гэтым абʼём продажаў наблізіўся да 30 млрд рублёў (447 млн долараў). Абодва паказнікі рэкордныя для ўсіх чатырох даччыных прадпрыемстваў МТЗ. Адна з крыніц заробкаў – дзяржзаказ. Фірмы атрымліваюць дзясяткі дзяржкантрактаў на сотні мільёнаў рублёў. Сярод замоўцаў – улады Масквы, МУС, а таксама рэгіянальныя адміністрацыі і дзяржпрадпрыемствы.
Кантраляваны сынам Аляксандра Лукашэнкі «Гандлёвы дом БелАЗ» таксама даў справаздачу аб рэкордных фінансавых выніках за мінулы год. Выручка кампаніі перавысіла 65 млрд рублёў (970 млн долараў), а чысты прыбытак – 2,6 млрд рублёў (38 млн долараў). Падрабязней аб тым, як сваякі Лукашэнкі зарабляюць на продажы тэхнікі БелАЗа чытайце ў нашым расследаванні.
Зарэгістраваны ў Маскве «Гандлёвы дом БМЗ» паказаў чысты прыбытак у 500 млн рублёў (7,5 млн долараў) пры выручцы ў 34,5 млрд рублёў (507 млн долараў). Кампанія рэалізуе на расейскім рынку прадукцыю, у тым ліку трубы для нафта-і газаправодаў.
Рост фінансавых паказнікаў зафіксаваў і «МАЗ-РУС», расейскае прадстаўніцтва Менскага аўтамабільнага заводу. Кампанія зрабіла справаздачу аб прыбытку ў 68 млн рублёў (1 млн долараў) і выручцы ў 33 млрд рублёў (492 млн рублёў). Гэта рэкордны паказнік за апошнія чатыры гады. На расейскім рынку МАЗ у асноўным рэалізуе аўтобусы і грузавікі.
