Карацей кажучы, CNN хлусіць, таму што на спіне ў пажарнага напісана назва канадскага гораду Эдмантан, а не Львоў. Значыць, заключаюць прапагандысты, гэта пажар у Эдмантану, а не ў Львове. А зараз тлумачым, чаму хлусяць не CNN, а менавіта «Слівы».
Справа ў тым, што ў Эдмантан існуе арганізацыя «Firefighter Aid Ukraine», якая пастаўляе ва Украіну неабходны пажарны рыштунак. На іх старонцы ў Facebook можна ўбачыць, які менавіта рыштунак яны пастаўляюць ва Украіну: боты, курткі, каскі. І тут жа прадстаўнікі арганізацыі размясцілі фота, на якім бачна, што на спецвопратцы, якую яны адпраўлялі ў Львоў, сапраўды ёсць надпіс «Эдмантан».
«Дзялюся гэтым пастом з 2017 года, калі мы раздавалі ахвяраваную бункерную амуніцыю ў Львове. Бачыце «Эдмантан» на спіне курткі? Тут няма ніякай змовы. Нашы сябры і калегі-пажарныя знаходзяцца ў небяспецы, і мы будзем працягваць падтрымліваць іх», – цытата з публікацыі на старонцы арганізацыі ў Facebook.
Прыцягненне да будаўніцтва касмадрома ў Расіі беларусаў - небывалы выпадак у гісторыі
Беларусы будуць будаваць касмадром Усходні ў Расіі. Аляксандр Лукашэнка назваў гэту падзею небывалым узроўнем даверу паміж краінамі і ўвогуле ўнікальным выпадкам у гісторыі.
«Тое, што вы прапануеце нам уключыцца з будоўлю, у гэтую гіганцкую будоўлю, – самы высокі ўзровень даверу... Прыняты закон у Расіі. Гэта ўвогуле выпадак рэдкі, увогуле такога не было, беларусы дапушчаныя да ўсіх закрытых аб'ектаў».
Дадаў пафасу падзеі і праўладны палітолаг Аляксей Дзермант у эфіры «Альфа радыё».
«Гэта акт найглыбейшага даверу з боку Расейскай Федэрацыі саюзніку Рэспубліцы Беларусь. Таму тое, што там беларусы прыехалі і яшчэ будуць працаваць, будаваць, дапамагаць - гэта вельмі важна. Бо не кожнай дзяржаве Расея давярае такія рэчы».
Насамрэч выпадак далёка не ўнікальны. І беларусы не першыя замежнікі, якія дапушчаныя да будоўлі «Усходняга». Лукашэнка і Дзермант забылі сказаць, што там ужо працуюць грамадзяне Узбекістана.
Яшчэ летам мінулага года паведамлялася, што туды адправілі працаваць 141 узбека. А мінулай восенню міністр будаўніцтва і ЖКГ Расіі расказаў, што іх там будзе больш за тысячу.
31 студзеня 2022 года кіраўніцтва Узбекістана падпісала з Расіяй нават афіцыйнае пагадненне.
А яшчэ раней да будоўлі «Усходняга» прыцягвалі нават студэнтаў. І галоўная прычына, чаму там зараз будуць працаваць беларусы - гэта банальны дэфіцыт кадраў.
Яшчэ ў чэрвені 2021 года расійскае інфармагенцтва ТАСС паведаміла, што краіне не хапае каля 2 млн будаўнікоў. Урад Расіі ва ўмовах дэфіцыту будаўнікоў гатовы прыцягнуць да работы над ключавымі аб'ектамі ў краіне каля 20-30 тыс. беларускіх спецыялістаў. І працытавалі расійскага віцэ-прэм'ера Марата Хуснулліна.
«Яны дастаткова паспяхова праектуюць і будуюць. Таму, калі мы прынцыпова дамовімся па кошце і па ўмовах, то, канечне, будзем прыцягваць».
Выходзіць, справа тут не ў глыбокім даверы і небывалым узаемным каханні, а ў тым, што проста беларускія працоўныя, як і ўзбекскія, уладкоўваюць Расею па якасці і кошту працы.
Фіны і шведы не хочуць у НАТА
Дэпутат расійскай Дзярждумы Дзмітрый Белік прыгразіў Фінляндыі і Швецыі праблемамі ў выпадку ўступлення ў НАТА.
«Фіннам і шведам сяброўства ў НАТА відавочна не пойдзе на карысць, мы ўжо зараз можам назіраць раскол у грамадстве па гэтым пытанні».
Насамрэч разыходжанні ў меркаваннях можна назіраць толькі ў Швецыі. Паводле апытанняў, пасля пачатку вайны Расіі супраць Украіны там колькасць прыхільнікаў уступлення рэзка вырасла з 30 да 45-49%.
Шведы быццам вагаюцца, але пры гэтым пазіраюць на Фінляндыю. І на пытанне "Ці павінна Швецыя ўступіць у НАТА, калі туды ўступіць Фінляндыя?" 63% насельніцтва адказвае, што тады і Швецыі трэба ўступаць.
А вось у Фінляндыі доля прыхільнікаў НАТА расце з кожным тыднем вайны. Цяпер за ўступленне 68% насельніцтва. Гэта значыць, ужо відавочная большасць. А калі туды вырашыць уступіць Швецыя, то, паводле звестак апытання, колькасць фінаў за ўступленне вырастае да 77%. Пры гэтым яшчэ ў студзені аб НАТА марыла толькі трэць насельніцтва.
Дзмітры Канавалаў і Уладзіслаў Кавалёў былі апазіцыянерамі
Рыгор Азаронак у сваім тэлеграм-канале размясціў фота ўкраінскіх дзяўчат, якое падпісаў так:
«Дзве ўкраінкі аблілі сябе мачой і лайном».
Па-першае, гэтае фота - не навіна, яго зрабілі яшчэ ў 2014 годзе ў Мілане. Тады там праходзіў форум «Азія - Еўропа», які наведаў у тым ліку і Пуцін.
А па-другое, дзяўчаты аблілі сябе чырвоным віном, а зусім не тым, пра што піша Азаронак. Гэта сімвалізавала кроў людзей, якія загінулі падчас узброенага канфлікту ва Украіне. Відаць, яны хацелі прыцягнуць увагу сусветнай супольнасці да гэтага канфлікту.
Таксама Азаронак у дзень гадавіны выбуху ў мінскім метро ён заявіў, што Дзмітры Канавалаў і Уладзімлаў Кавалёў былі «змагарамі».
«Сёння спаўняецца 11 гадоў страшнай трагедыі на станцыі метро "Кастрычніцкая". Два вар'яты саракі ўчынілі выбух. Проста так, з нянавісці да „быдла“».
І пасля гэтага заклікаў паглядзець фільм аб тэракце, зняты 9 гадоў таму. Дык вось у гэтым фільме няма ні слова аб тым, што асуджаныя па справе аб выбуху ў метро былі неяк звязаныя з палітыкай ці апазіцыяй.
Больш за тое, намеснік генеральнага пракурора Беларусі Андрэй Швед падкрэсліваў, што яны - адзіночкі, у іх не было ні замоўцаў, ні куратараў.
«У мяне няма ніякіх сумневаў у тым, што Кавалёў і Канавалаў - гэта адзіночкі, якія такім чынам спрабавалі рэалізаваць сябе ў жыцці».
Зверствы беларускіх добраахвотнікаў
Тэлеканал АНТ расказаў пра зверствы беларускага батальёна Каліноўскага. Сцвярджаецца, што яны адны з першых увайшлі ў Бучу і арганізавалі крывавую пастаноўку з трупаў. У якасці доказаў АНТ нават паказаў наступнае відэа.
«З нядаўняга часу ў складзе Азова батальён Каліноўскага. Беглыя беларусы па пашпарце, па духу - звычайныя нацысты. І свайго роду вэб-кам мадэлі для пазёрства і запалохвання. Многія адправіліся на сустрэчу са сваімі кумірамі. Тыя, што засталіся, працягваюць забіваць. Адны з першых уваходзілі ў Бучу. Паглядзіце, як яны ўсе разам валакуць трупы для крывавай пастаноўкі ў Бучы. Гэтыя кадры для тых, хто ўсё яшчэ не верыць. Пра зверствы нацыяналістаў расказваюць людзі з усёй Украіны».
На самай справе, гэта відэа, знятае аператарамі агенцтва Асашыэйтэд прэс. Вось яно выкладзена ў іх архіве.
Тут жа ёсць інфармацыя, што знята відэа 2 красавіка 2022 года ў Бучы. Побач аўтар дае апісанне да частак відэа. Вось, напрыклад, яны пазначае: кадр 9 - салдаты цягнуць цела тросам, баючыся, што цела замініравана.
Ніжэй ідзе апісанне сюжэту, з якога вынікае, што, па-першае, на кадрах украінскія вайскоўцы. Няма ніякіх падставаў сьцьвярджаць, што гэта байцы беларускага батальёну Каліноўскага. А па-другое, яны не раскладваюць целы, а наадварот іх прыбіраюць.
«Украінскія вайскоўцы пры падтрымцы калоны танкаў і бронетэхнікі прывязалі да целаў трасы і выцягнулі іх з вуліцы, баючыся, што яны могуць быць замініраваны выбуховымі прыладамі».
