Тэорыю змовы, у выніку якой у сталіцы Манголіі пабудавалі музей Чынгісхана, палітолаг Андрэй Лазуткін абмеркаваў з Рыгорам Азаронкам 3 чэрвеня 2024 года ў эфіры праграмы «Азаронак. Наўпрост».
«Чаму галоўная плошча гораду? Там парламент невялікі, там савецкі будынак невялікі Вярхоўнага савету і велізарны музей Чынгісхана. Вышэй там за ўсё. Давайце сёння ў нашай краіне паставім на п'едэстал нейкага дзеяча, які вёў баявыя дзеянні супраць Расеі, Расейскай імперыі або падчас феадальных часоў. Будзем яго выпінаць, пабудуем велізарны музей і ўсё іншае. Такія музеі, як вы правільна сказалі, пабудавалі там заходнікі падчас кіравання не гэтай кіроўнай партыі, якая там цяпер, а тыпу дэмакратаў. То бок, у нас вялікая такая гісторыя і два суседа — Расея і Кітай. І вы паказваеце, што мы так ганарымся тым перыядам, калі мы вас усіх там нагнулі, рускіх і кітайцаў. Гэта выдатная лінія. Каму яна выгадная, такая гістарычная лінія, Рыгор? Напэўна, амерыканцам, якія ніякага дачынення не маюць да гэтай Манголіі. Але яны робяць так, каб з'яўляўся нацыяналізм, які варагуе з двума буйнымі, вялізнымі хаўруснікамі», — сказаў на заканчэнне Лазуткін.
Дзевяціпавярховы музей Чынгісхана ўзвялі па ініцыятыве цяперашняга прэзідэнта Манголіі Ухнаагійна Хурэлсуха. Таго самага, з якім 3 чэрвеня 2024 года сустракаўся Аляксандр Лукашэнка і з якім Беларусь наладжвае адносіны.
На галоўнай старонцы афіцыйнага сайту Нацыянальнага музею Чынгісхана напісана, што ён створаны па рашэнні прэм'ер-міністра, прынятым у 2019 годзе. Тады гэтую пасаду займаў цяперашні прэзідэнт Манголіі Ухнаагійн Хурэлсух, выхадзец з кіруючай Мангольскай народнай партыі.
Хурэлсух адкрыта заяўляе, што лічыць Чынгісхана і яго пераемнікаў будаўнікамі цывілізацыі, распаўсюджвальнікамі асветы, міратворцамі і піянерамі развіцця. Кожныя тры гады пад эгідай прэзідэнта Манголіі праходзіць «Міжнародная канферэнцыя па вывучэнні Чынгісхана». Ён стварыў Міжнародную асацыяцыю па вывучэнні Чынгісхана, а таксама выдаў указ пра тое, што ўсе жыхары краіны павінны шанаваць легенду пра Чынгісхана. Больш за тое, Хурэлсух прапанаваў унесці імя Чынгісхана ў Канстытуцыю Манголіі.
