Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Нашыя журналісты атрымалі прэмію Ганса Штайгэра за журналісцкія расследаванні ад Міжнароднага цэнтру журналістаў (ICFJ), прэмію за свабодныя СМІ (Free Media Award) ад фондаў ZEIT-Stiftung Bucerius і Fritt Ord, а таксама прэмію за дасягненні ў журналістыцы дадзеных (Data Journalism Award) ад Грамадства садзейнічання развіццю працоўнай дзейнасці журналістаў і рэдакцыі (SABEW). Наш праект Dubai Unlocked увайшоў «у шорт-ліст» Sigma Awards.
З 2018 па 2026 год нашыя журналісты таксама атрымалі 11 узнагародаў беларускай нацыянальнай прэміі «Вольнае слова».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Азаронак заявіў, што беларусы і жыхары Захаду «каштоўнасна абсалютна розныя». Што паказваюць апытанні
Сям’я, здароўе і грошы ўвайшлі ў лік галоўных каштоўнасцяў і ў Беларусі, і ў ЗША з Вялікай Брытаніяй.
Вядоўца Рыгор Азаронак прадставіў вынікі апытання беларусаў як сведчанне іх абсалютнага каштоўнаснага адрознення ад жыхароў заходніх краінаў. Аднак ён не назваў заходняга апытання, на вынікі якога спаслаўся, а дадзеныя іншых даследаванняў не пацвярджаюць яго высновы.
Кантэкст: У верасні 2026 года Інстытут сацыялогіі НАН Беларусі прадставіў вынікі апытання больш як дзвюх тысяч жыхароў краіны. Іх пыталі ў тым ліку пра матэрыяльнае становішча і жыццёвыя прыярытэты.
14 верасня 2026 года вядоўца перадачы «Азаронак. Наўпрост» Рыгор Азаронак абмеркаваў вынікі гэтага апытання. Ён пералічыў жыццёвыя прыярытэты, названыя беларусамі, а затым супрацьпаставіў іх каштоўнасцям жыхароў заходніх краінаў.
«На Захадзе падобныя сацапытанні праводзіліся. Там асабістыя правы і свабоды, камфорт і самарэалізацыя — гэта першыя тры пункты. У нас — здароўе, сям’я, ну, значыць, матэрыяльны дастатак. … То-бок мы з Захадам каштоўнасна абсалютна розныя».
Апытання жыхароў заходніх краінаў менавіта з такой тройкай лідараў камандзе Weekly Top Fake выявіць не ўдалося. Блізкае паводле тэмы апытанне Еўрабарометра было ўстроена інакш: удзельнікам прапаноўвалі выбраць важнае для іх з 13 загадзя зададзеных варыянтаў. Клопат пра блізкіх — варыянт, блізкі да сям’і, — заняў другое месца. Здароўя і любові сярод прапанаваных адказаў не было. Таму адрозненні паміж спісамі адказаў самі па сабе не паказваюць, што ў людзей розныя каштоўнасці.
Больш блізкае паводле фармулёўкі пытання апытанне Statista Consumer Insights правяла ў студзені 2026 года. Жыхароў ЗША, Вялікай Брытаніі і Нямеччыны папрасілі выбраць тры самыя важныя аспекты жыцця. У ЗША і Вялікай Брытаніі часцей за ўсё называлі сям’ю, здароўе і грошы — тыя ж каштоўнасці, якія Азаронак вылучыў у беларускім апытанні. У Нямеччыне ў першую тройку ўвайшлі здароўе, сям’я і бяспека.
Гэтыя апытанні не даюць падставаў сцвярджаць, што жыццёвыя каштоўнасці беларусаў і жыхароў заходніх краінаў «абсалютна розныя». Прынамсі названыя Азаронкам здароўе і сям’я важныя і для апытаных жыхароў заходніх краінаў.
