Кантэкст: У менскіх дварах плануюць усталяваць 20 тыс. камераў відэаназірання. За жнівень на фасадах дамоў з’явілася ўжо тысяча камераў, а завяршыць працы маюць намер да канца 2028 года. У «Менскай гарадской жыллёвай гаспадарцы» патлумачылі ўсталяванне камераў неабходнасцю палепшыць працу арганізацыяў ЖКГ: сістэма павінна дазволіць кантраляваць якасць і своечасовасць аказання паслугаў.
11 верасня 2026 года ў сацсетках праекту блогера Антона Шабуневіча «Беларусь Тут» паведамілі, што Беларусь нібыта ўвайшла ў дзясятку самых бяспечных краін свету:
«Беларусь увайшла ў топ-10 самых бяспечных краін свету! У абноўленым сусветным рэйтынгу ўзроўню бяспекі Беларусь упэўнена заняла высокае 7-е месца, апярэдзіўшы большасць еўрапейскіх дзяржаваў і шэраг вядучых сусветных дзяржаў».
У публікацыі таксама сцвярджалася, што па ўзроўні бяспекі Беларусь абышла Польшчу, Літву і ЗША. Пры гэтым назву рэйтынгу або крыніцу дадзеных аўтары не пазначылі.
Крыніца: instagram.com/zdes.by
У Глабальным індэксе міру, адным з найбольш вядомых міжнародных рэйтынгаў, Беларусь знаходзіцца далёка ад першай дзясяткі. Індэкс ацэньвае міралюбнасць краін у шырокім сэнсе на аснове статыстычных дадзеных і экспертных ацэнак. Улетку 2026 года пазіцыя Беларусі крыху палепшылася: краіна заняла 115-е месца сярод 163 дзяржаў супраць 119-га у 2025 годзе. Па асобным паказніку «Грамадская бяспека і абароненасць», які дазваляе ацаніць, наколькі бяспечна чалавек пачуваецца на вуліцы, вынік Беларусі вышэйшы — 97-е месца.
Яшчэ адзін міжнародны рэйтынг — Індэкс вяршэнства права арганізацыі «Сусветны праект правасуддзя». Яго складаюць на аснове ацэнак жыхароў і экспертаў. У катэгорыі «Парадак і бяспека» ў 2025 годзе Беларусь заняла 41-е месца сярод 143 краін. Гэта найлепшы вынік краіны сярод прыведзеных рэйтынгаў, але і ён далёкі ад заяўленай сёмай пазіцыі.
У індэксе бяспекі Numbeo Беларусь знаходзіцца на 90-м месцы са 150. Гэты паказнік таксама фармуецца на аснове ацэнак карыстальнікаў пра ўзровень злачыннасці і пра тое, наколькі бяспечна яны пачуваюцца на вуліцы.
Ёсць і іншыя міжнародныя ацэнкі, але яны таксама не пацвярджаюць заяўленае 7-е месца. Рэйтынг Gallup Law and Order, які вымярае адчуванне бяспекі жыхароў розных краін, Беларусь не ацэньваў. А International SOS Risk Map увогуле не размяркоўвае дзяржавы па месцах: краіны там падзеленыя паводле ўзроўню рызыкі бяспекі і аховы здароўя. Беларусь на гэтай карце адносіцца да зоны нізкай рызыкі бяспекі.
