Польская эканоміка стагнуе? Праверылі лічбы і параўналі з беларускімі

Пра стагнацыю польскай эканомікі распавялі 16 жніўня 2025 года ў рубрыцы «Вынікі тыдня» на канале News.by:

«Чакана, што ў гэты час паказнікі эканамічнага росту Польшчы ўсё ніжэйшыя і ніжэйшыя. Еўрапейскі банк тлумачыць гэта рэзкім ростам глабальнай нявызначанасці і зніжэннем вонкавага попыту. Аднак, калі б палітыкі і міністэрствы былі занятыя сваёй справай, а не клопатамі вонкавага свету, то і стагнацыю можна было б разгарнуць у прагрэс».

Еўрапейскі банк рэканструкцыі і развіцця ў траўні сапраўды знізіў прагноз па росце ВУП Польшчы на 2025 год, але ўсяго на дзясятую долю адсоткавага пункта. Гэта значыць, што рост эканомікі чакаецца 3,3%, а не 3,4%, як прагназавалі ў лютым.

Дадзеныя аб дынаміцы развіцця эканомікі Польшчы пасля пандэміі паказваюць, што яна расла. Адразу пасля эпідэміі — на 5-7%, у 2023 годзе больш сціпла — 0,1%, а ў 2024-м рост паскорыўся да 2,9%. У 2025-м вядучыя міжнародныя інстытуты і польскі ўрад чакаюць каля 3-4% росту. Паводле звестак за першы квартал, ВУП Польшчы вырас на 3,2%, а ў другім — на 3,4%.

У Беларусі рост ВУП запавольваецца ад месяца да месяца. За першае паўгоддзе 2025-га больш чым у паўтара раза — да 1,3%. Хоць урад і Еўразійскі банк развіцця прагназуюць, што па выніках года гэты паказнік вырасце амаль да польскага плана — 3%.