Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Самае бруднае паветра ў Польшчы? ЖС Premium выдаў прамежкавыя дадзеныя за выніковы рэйтынг
У "брудным" спісе 120 мегаполісаў планеты.
Тэлеграм-канал ЖС Premium апублікаваў спіс мегаполісаў з найгоршай якасцю паветра. З яго вынікае, што польскія гарады — адныя з самых забруджаных у свеце. Каманда Weekly Top Fake разабралася, ці так гэта.
У другой палове верасня праз лясныя пажары Гомельскую вобласць, якая мяжуе з Расеяй і Украінай, зацягнула дымам. Жыхары Гомля скардзіліся на пах гару і пагаршэнне якасці паветра, пісаў «Зялёны партал» 17 верасня. Праз пяць дзён аўтары тэлеграм-каналу ЖС Premium апублікавалі рэйтынг гарадоў свету з самым забруджаным паветрам.
«ТОП самых брудных гарадоў планеты. Гаворка, вядома ж аб забруджанасці паветра.
Варта заўважыць, што на самым пачатку спісу адразу некалькі польскіх гарадоў — Варшава, Уроцлаў, Кракаў. Таксама ў спіс трапіў Кіеў.
А ўвогуле ў "брудным" спісе 120 мегаполісаў планеты. Беларускіх гарадоў сярод іх няма. З расейскіх — толькі Краснаярск (86 месца) і Масква (115-ае)», — напісалі аўтары гэтага тэлеграм-каналу.
Апублікаваны ЖС Premium рэйтынг — скрыншот з сайту IQAir, бясплатнай платформы, якая дае інфармацыю аб якасці паветра. Рэйтынг уключае 120 найбуйнейшых гарадоў планеты і абнаўляецца ў рэальным часе, таму ягоныя паказнікі ўвесь час змяняюцца. Паводле звестак на 11:41 паводле менскага часу 30 верасня 2024 года, ніводнага польскага гораду на пачатку рэйтынгу няма.
Няма польскіх гарадоў і ў топе самых забруджаных па выніках 2023 года — у ім толькі населеныя пункты з Азіі.
Адсутнасць беларускіх гарадоў у «брудным спісе» звязаная з тым, што на тэрыторыі Беларусі няма ніводнай станцыі кантролю якасці паветра, якая б адсочвала дадзеныя для гэтага рэйтынгу.
