Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Нашыя журналісты атрымалі прэмію Ганса Штайгэра за журналісцкія расследаванні ад Міжнароднага цэнтру журналістаў (ICFJ), прэмію за свабодныя СМІ (Free Media Award) ад фондаў ZEIT-Stiftung Bucerius і Fritt Ord, а таксама прэмію за дасягненні ў журналістыцы дадзеных (Data Journalism Award) ад Грамадства садзейнічання развіццю працоўнай дзейнасці журналістаў і рэдакцыі (SABEW). Наш праект Dubai Unlocked увайшоў «у шорт-ліст» Sigma Awards.
З 2018 па 2026 год нашыя журналісты таксама атрымалі 11 узнагародаў беларускай нацыянальнай прэміі «Вольнае слова».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Беларусь — дзясятая краіна ў свеце па ўзроўні інфляцыі? Правяраем, ці так гэта
А вось у дзясятку сярод краін Еўропы Беларусь магла б увайсці.
Рэгуляванне коштаў, якое ўвялі беларускія ўлады ў кастрычніку 2022 года, не працуе, сцвярджае эканаміст Яраслаў Раманчук. У доказ ён прыводзіць дадзеныя, што краіна ўвайшла ў дзясятку сусветных лідараў па ўзроўні інфляцыі. Каманда Weekly Top Fake праверыла, ці сапраўды гэта так.
Меры па ўрэгуляванні росту коштаў, прынятыя ў Беларусі, Яраслаў Раманчук раскрытыкаваў у гутарцы з журналісткай і відэаблогеркай Таццянай Мартынавай 12 сакавіка 2024 года.
«Калі б ручное рэгуляванне коштаў гарантавала стабільнасць і нізкую інфляцыю, тады Беларусь бы не была дзясятай краінай у свеце паводле ўзроўню інфляцыі», — аргументаваў свой пункт гледжання эканаміст.
Спажывецкія кошты ў Беларусі за 2023 год выраслі на 5,8%. Беларусі з такім паказнікам далёка да дзясятага месца. У тройцы краін-лідараў у свеце — Аргенціна з 211%, Ліван са 192% і Венесуэла, дзе кошты выраслі на 190%. Замыкае дзясятку Куба з інфляцыяй у 31%.
А вось у дзясятку сярод краін Еўропы Беларусь магла б увайсці. Тут лідаруе Турцыя — за год цэны выраслі больш, чым на 60%. Следам ідзе Чэхія — там інфляцыя 7,6%. І на восьмым месцы, паміж Польшчай і Аўстрыяй, магла б быць Беларусь.
