Пра эканамічную сітуацыю ва Украіне Аляксей Бяляеў, дэкан факультэту журналістыкі БДУ разважаў у эфіры «Альфа Радыё» 26 лістапада 2024 года.
«Украіна сёння перайшла да гэтай вось мабілізацыйнай эканомікі. Украіна перайшла цалкам... Там ужо і нармаванне харчавання ўводзіцца, там ужо ўводзяцца розныя паказнікі ваеннага часу», — заявіў Бяляеў, але не распавёў, адкуль у яго такая інфармацыя.
Расейскія тэлеграм-каналы ў кастрычніку 2024 года пісалі, што ў Жытоміры зніклі з прылаўкаў крупы і мука, і паказвалі відэа з пустымі паліцамі ў супермаркеце, знятае нібыта нядаўна.
Аказалася, што відэа знялі двума гадамі раней, у пачатку вайны, не ў Жытоміры, а ў Каменскім. Тады праз актыўныя баявыя дзеянні ўзніклі праблемы з лагістыкай па ўсёй краіне. Аднак яны былі часовымі і закранулі пастаўкі толькі некаторых прадуктаў.
Камандзе WTF не ўдалося знайсці інфармацыі, што ва Украіне ўвялі прадуктовыя карткі або ёсць дэфіцыт прадуктаў. Мы спыталі жыхароў краіны, ці ёсць у іх праблемы з купляй харчавання і ці сустракаюць яны пустыя паліцы ў крамах.
«Хачу паказаць, што з ежай у Кіеве ўсё добра. Людзі ходзяць, купляюць, няма ніякіх абмежаванняў. Усе паліцы занятыя», — з такім подпісам нам даслалі відэа з Кіева, на якім бачна, што прадукты на прылаўках сапраўды ёсць.
Па відэа з крамаў Вінніцы і Львова таксама нельга сказаць пра дэфіцыт харчавання. Ніхто з апытаных намі жыхароў не пацвердзіў, што на куплю прадуктаў былі ўведзеныя якія-небудзь абмежаванні.
